Гасоводот Скопје – Гостивар се очекува да биде готов во 2019 година

Министерот за транспорт и врски, Горан Сугарески вчера оствари средба со директорот на Македонски Енергетски Ресурси (МЕР) Благојче Котески, на која разговараа за процесот на гасификација и изградбата на секундарната мрежа во Република Македонија.

На средбата директорот го информираше министерот за динамиката на изградба на делниците Неготино – Битола и Скопје – Гостивар како и најавите за интерконекција со Грција и Бугарија.

“Гасификацијата е врвен пиоритет на Владата и во таа насока ќе продолжиме интензивно да работиме да обезбедиме цевки со гас до секоја општина. На одредени траси имаме проблеми со експропријацијата но се работи на терен и верувам дека во следниот период ќе ги надминеме сите вакви ситуации за да можеме ефикасно да продолжиме со изградбата. Интензивно работиме на разрешување на имотно правните работи во делот на ескпропријацијата и на двете делници и тоа делницата Неготино – Битола која очекуваме да биде завршена во 2020 година, како и на делницата Скопје-Тетово-Гостивар која очекуваме да биде готова крајот на 2019 година. За да влеземе во еден непречен ритам во изградба, оваа година паралелно ќе работиме и на решавање на експропријацијата и на изградба на одредени делови, така да следната година очекуваме да имаме чист терен и ефикасно да продолжиме и да ги завршиме овие магистрали. За оваа година обезбедивме околу 40 милиони евра за гасоводната мрежа и очекувам дека со силно темпо ќе продолжиме да го реализираме овој проект кој е од исклучително значење не само за граѓаните туку и за целокупната економија”, истакна министерот Сугарески.