КК Гостивар и Перо Антиќ со хуман гест – 8.000 евра за помош на Гешо

КК Гостивар и претседателот Перо Антиќ, се приклучуваат кон хуманитарната акција за помош на кошаркарската легенда, Стеван Гешовски Гешо.

Гешовски пред две години доживеа исхемичен мозочен удар. Како последица на тоа има отежнат говор, парализирана десна страна и болки во екстремитетите, за што најадекватна метода за лекување е терапија со матични клетки во Москва. Лекарите веруваат дека со помош на оваа терапија би ги вратиле моторните функции на екстремитетите, неговиот говор и дека тој би бил ослободен од константните болки. Терапијата со матични клетки во Москва чини 17.000 евра.

“На Гешо му недостасуваат уште 8.000 евра, оваа сума ќе ја обезбеди Кошаркарскиот Клуб Гостивар и претседателот Перо Антиќ. Се надеваме дека ќе му помогнеме на Гешо, да го врати животот што го имаше претходно” – изјавуваат од клубот.

Стеван Гешовски е поранешен кошаркар на МЗТ Скопје и Работнички, поранешен технички директор на македонската репрезентација како и поранешен репрезентативец на некогашна СФРЈ.

Хуманитарната акција за помош на Гешо трае повеќе од 10 месеци. Во неколку наврати се организираа настани за помош на Гешовски, но средствата тешко се собираа.