• Дата: 13/02/2018

Клучката за Тумчевиште една од ризичните точки за сообраќајки со животни

На патиштата во Полог и особено на автопатот Гостивар-Тетово-Скопје и годинава неретко се случуваат сообраќајни несреќи предизвикани од животни, најмногу од кучиња-бездомници, алармира Секторот за внатрешни работи.

Вакви несреќи се регистрирани на неколку места, пред се во близина на клучките за Камењане и Тумчевиште и на делот од автопатот кон Желино. Во нив, за среќа немало човечки жртви, освен две повредени лица и причинета значителна материјална штета на возилата, која просечно по несреќа се движи од 10 до 50 и 100 илјади денари, зависно од видот на возилото.

Минатата година на ова подрачје регистрирани се близу 100   несреќи со животни, од кои 71 на тетовските простори и 28 на гостиварските, претежно со кучиња, а претходната 2016 година-118 несреќи.

Секторот за внатрешни работи Тетово апелира до возачите да бидат докрај внимателни кога се движат по автопатот, посебно во доцните вечерни часови, затоа што кучињата често пати неконтролирано влегуваат на коловозот или претрчуваат од една на другата страна, како резултат на нефункционалната жичана заштитна ограда, која  или е оштетена или целосно ја нема.

Оставете коментар

Вашата Емаил адреса нема да биде објавена.Задолжителните полиња се означени *

*