Кој се плаши од Петок 13?

Преку одредени истражувања се дошло до заклучок дека повеќе од 20 милиони луѓе во светот се плашат од Петок 13 и го сметаат за несреќен ден. Поради тоа свое верување често се обидуваат, едноставно да го преспијат овој ден. Не одат на работа, не трошат пари, не донесуваат големи одлуки, не купуваат куќи, не стапуваат во брак, не одат да јадат во ресторани.

Самиот број 13 луѓето го сметаат за несреќен, а тоа се одразува во културите на многу држави. Многу хотели и станбени згради немаат 13 кат.

Психолозите тврдат дека соочувањето на стравот од Петок 13 кај некои луѓе може да биде клучно во споредбата со тоа како истите се соочуваат со другите секојдневни стресни ситуации и стравови. Оние кои се плашат од Петок 13 се малку поанксиозни отколку просечните луѓе. Се смета дека нивната загриженост во очекувањето на еден ден како што е Петок 13 или број 13, ќе ги направи нервозни и анксиозни во врска со многу други работи кои секојдневно ги опкружуваат.

Но, постојат и луѓе за кои Петок 13 претставува среќен ден, а 13 среќен број. Правила нема, одлучувате сами, дали ќе верувате во себе или во суеверија.

Што се однесува до потеклото за „страшниот“ Петок 13, има повеќе верзии: почнувајќи од тоа дека Ева во рајот го измамила Адам со јаболкото токму во петок, дека на тој ден се случила библиската поплава, дека Бог на петок 13-ти ги измешал јазиците на Вавилонската кула, а и Исус Христос бил распнат в петок. За „несреќниот“ број 13 се врзува и верувањето дека токму толку луѓе биле на Тајната вечера.

Како најубедливо верување, историчарите го посочуваат настанот што се случил на 13 октомври, петок, 1307 година, кога францускиот крал Филип Четврти наредил да се уапсат и погубат водачот на темпларскиот ред Жак де Молеј и шеесетина негови најблиски приврзаници.