Лани во гостиварско имало четири малолетни невести – опаѓа бројот на малолетнички бракови

Се намалува бројот на малолетнички бракови на гостиварското подрачје во последните неколку години. За разлика од порано, кога формирањето на брачна заедница со малолетник беше почеста појава, сега веќе состојбите се менуваат. Податоците на Центарот за социјална работа во Гостивар покажуваат дека во 2016-та имало петнаесет малолетнички бракови, додека лани бројката паднала на четири. Службите паметат дека пред 7-8 години имало и по триесетина случаи годишно, од кои најголем дел биле македонски муслимани или ромска популација.

„Сега од година во година бројката постојано се намалува. Веројатно повеќе се слушаат советите на родителите и совеста проработува кај младите. Сепак, тоа се личности кои се наоѓаат во ранлива возраст, се уште не се сериозни, не се психо-физички созреани за да ги сфатат обврските и сето она што го носи бракот. Токму затоа и ризикот од развод е поголем кај малолетничките бракови“, вели Надица Величкоска, директор на Центарот за социјална работа во Гостивар.

Искуството говори дека во најголемиот процент од случаите, невестата е таа која нема 18 години.

При одлука за малолетнички брак, парот мора да посети Советувалиште за брак и семејство кадешто добиваат совети, информации и едукација околу она што го носи заедничкиот живот и бракот.