Одбележани 62 години од мавровската снежна трагедија

Пред споменикот на градителите на мавровскиот хидроенергетски систем во Маврови Анови, утрово се одржа пригоден собир во спомен на трагедијата од 1956 година, кога при снежни лавини во Маврово и околината, животите ги загубија 52 лица, градители, граничари и мештани.

Одбележувањето го организираше ХЕЦ „Маврово“. Присутните на настанот со едноминутно молчење и положување на цвеќе им оддадоа почит на загинатите во трагедијата.

„Во знак на сеќавање на оваа голема трагедија, што ги потресе жителите на цела тогашна Југославија, бидејќи градители имаше од сите нејзини краишта, подигнат е овој споменик, а по тој повод се одржува и традиционалниот мавровски меморијал. Ние вработените во Хидроцентралите „Маврово“ секоја година во чест на денот, се собираме пред овој споменик, полагаме свежо цвеќе и се потсетуваме на големата трагедија. Со тоа сакаме да им дадеме до знаење на сите наши вработени, дека луѓето што загинаа во оваа трагедија вечно не задолжија, положувајќи ги своите животи“, рече во својот говор Ѓорѓи Божиноски, директор на ХЕЦ „Маврово“.

Ноќта на 11 февруари, 1956 година, по долината на Радика неколку снежни лавини се урнале врз куќи, бараки на градежници и караули при што биле затрупани стотина луѓе. Спасувачките екипи успеале да извлечат само половина од нив.

Споменикот на градителите е подигнат во 1970 година, а ја симболизира храброста на градителите. На спомен плоча пак се врежани имињата на сите загинати во снежните лавини.