Разговор со д-р Ивица Богданоски – Како да се заштитиме од грип и настинки?

Во сезоната на грип и настинки важно е да знаеме кои се мерките на заштита и што треба да преземеме за полесно да ги пребродиме болестите. На оваа тема зборуваме со д-р Ивица Богданоски, доктор на медицина во ПЗУ ДР.ИВИЦА во Гостивар.

Во овој временски период настинките и грипот ги напаѓаат граѓаните. Кои мерки на превенција ги препорачувате за да се подигне имунитетот и да се зајакне организмот?

д-р Богданоски:Внесување на многу овошје и зеленчук, избегнување на затворени, загушливи простории, кафулиња и слично. Редовно проветрување на домот или работната просторија. Внесување многу Ц-витамин. Кај постари и хронично болни лица се препорачува да ја примат вакцината против грип во просториита на Центарот за јавно здравје. Исто така треба да се избегнува контакт со луѓе со симптоми на грип. Медицинските лица кои имаат непосреден контакт со пациентите треба да носат заштитни маски.

Грипот и настинките многу ги погодуваат децата. Што да направат родителите за да ги заштитат и дали треба децата и бебињата да се изолираат дома додека е сезона на вируси?

д-р Богданоски:Некои работи е невозможно да се спречат, тоа е факт кога се работи за гриповите и малите деца. Би требало да се избегнуваат секакви поголеми собирања, гужви, па дури и да не се носат во градинка, секако ако тоа е можно.

Која е разликата меѓу настинка и грип?

д-р Богданоски:Воглавно, симптомите се многу слични. Дијагнозата ГРИП се поставува само ако се изолира вирусна инфекција. Кога станува збор за настинка и грип симптомите се следни: покачена температура, затнат нос или течење на воден секрет од носот, чувство на гребење на грлото, главоболка, кивање, кашлица, болка во мускулите, замор.

Познато е дека граѓаните сакаат да се лекуваат на своја рака. При кои симптоми е неопходно да побараат лекарска помош?

д-р Богданоски:Граѓаните може да побараат лекарска помош и никако не смеат да земаат лекарства на своја глава, но најголема причина за барање на лекарска помош е висока температура.