СВР Тетово: Планинарите да го пријавуваат движењето за да се избегнат последици

Секторот за внатрешни работи Тетово апелира до љубителите на белите спортови и планинарењето, особено до странските државјани, доколку планираат  искачување на планинските врвови или скијање, поединечно или групно, да се пријават во најблиските полициски станици или одделенија.

„При пријавувањето, пожелно е да информираат каде ќе се движат и колку мислат да се задржат, за да може побрзо да се лоцираат и доколку има потреба, да им се помогне. Во одредени ситуации мошне значајна е секоја минута, особено при неповолни временски состојби и на тешко достапни терени, на кои објективно нема можност за воспоставување телефонски контакт или друга комуникација со изгубените лица“, наведуваат од полицијата.

На подрачјето на Секторот за внатрешни работи Тетово, минатиот и овој месец биле пријавени неколку заталкувања на поединци на планински предели. Тие поради непознавање на теренот или неповолни временски прилики, се изгубиле и не можеле да се вратат назад.

Изгубените биле пронајдени и безбедно вратени со потраги реализирани од полициски службеници во координирација со други служби.