Таравари ги кани гостиварци да дебатираат за буџетот за 2018

На првиот работен ден од новата година 2 јануари, во општина Гостивар ќе се одржи јавна презентација на предлог буџетот за 2018-та година. Градоначалникот Арбен Таравари ги покани граѓаните да учествуваат во креирањето на општинската каса со свои предлози и забелешки. „Следствено на моите и стремежите на моите соработници, за да го подигнеме нивото на транспарентност во работата на Општина Гостивар, и со цел вие да станете активни чинители и активно да се вклучите во дебати кои директно влијаат на вашите индивидуални, групни и колективни интереси, одлучивме  јавно да го презентираме  предлог-буџетот на Гостивар за 2018 година. Ве покануваме да учествувате на презентацијата и да кажете свои  забелешки и предлози. Вашите разумни предлози ќе бидат земени предвид, ќе се разгледаат и според можностите ќе бидат внесени во предлог-буџетот на Општината за 2018 година. Се надевам дека во наредните денови ќе се постигне компромис во Советот и ќе се фати последниот рок, во првите денови на 2018 година да го усвоиме буџетот и веднаш да почнеме со негово извршување“, стои во изјавата на градоначалникот.

Презентацијата ќе се одржи во вторник (02.01.2018 година) со почеток во 16.00 часот во салата на Советот на Општина Гостивар.