Ученици од Гостивар со два пехари и бројни награди на престижен меѓународен натпревар

Осмоодделенци од основното училиште „Мустафа Ќемал Ататурк“ од Гостивар постигнаа голем успех на натпреварот по англиски јазик The World Scholar`s Cup, кој се одржа пред два дена во Скопје. Стефани Гаврилоска, Анастасија Симуноска и Никола Гостовиќ тимски освоија два пехари за дебата во јуниорска конкуренција, а сите поединечно освоија по пет златни и пет сребрени медали во различни дисциплини и области.

Натпреварот има четири дисциплини: дебата, тимско пишување, ученички предизвик и ученички куп. Учениците го мерат познавањето на англискиот јазик во неколку области: меѓучовечки односи, историја на дипломатијата, уметност и музика, наука,  општествени науки и литература.

Гостиварските осмоодделенци, со својот успех обезбедија директен пласман на Глобалните светски натпревари во Барселона и во Мелбурн, кои ќе се одржуваат летово.

The World Scholar`s Cup е престижен меѓународен натпревар, кој истовремено се одржува во педесет држави низ светот. Во Македонија учество зедоа околу 400 основнци и средношколци поделени во категории, сениори и јуниори.