Во полошките локали лани откриени 119 странски и 67 македонски државјанки

Во функција на откривање и законско санкционирање на нелегалното престојување и работење на странски државјани и нивна евентуална инволвираност во трговија со луѓе, проституција или други криминални активности, Секторот за внатрешни работи Тетово лани ( 2017 година ) спроведе 28 акциски контроли ( ТЕ-15 и ГВ-13) или 6 повеќе од претходната година.

Во овие контроли, спроведени во угостителски објекти, затекнати, односно откриени се вкупно 119 странски државјанки или речиси двојно повеќе од 2016 година.

Најголемиот број од нив-69 биле од Република Албанија, 38 од Република Србија, 10 од Република Косово и по 1 од Република Бугарија и Црна Гора. Покрај нив, откриени се и 67 македонски државјанки.

Откриените странски државјанки најчесто го злоупотребиле туристичкиот престој, односно престојувале спротивно на целта, изготвени им се поднесоци и депортирани се во нивните матични земји, претежно со изречени парични глоби и со забрани за влез во Република Македонија од 1 до 5 години, соопштуваат од полицијата.

Инаку, странските и македонските државјанки во објектите во кои се затекнати најмногу биле ангажирани како пејачки, танчерки, келнерки или собарки и нивното работење и престој, во многу случаи не било пријавено.