1-ви декември ден за борба против ХИВ СИДА – Во Гостивар годинава два нови случаи на ХИВ

Годинава, Светскиот ден за борба против ХИВ-СИДА, 1-ви декември,  Гостивар го дочекува со две новозаразени лица од ХИВ вирусот. Според евиденцијата на епидемиолошкото одделение на Центарот за јавно здравје во Гостивар, се работи за жена на возраст од 50 до 59 години и маж со над 60 години кои вирусот го добиле по хетеросексуален пат. Новите случаи беа регистрирани во март и со нив вкупната бројка на заболени на поширокото гостиварско подрачје достигна седум.

Во епидемиолошкото одделение години наназад постои можност за правење тест за откривање на ХИВ/СИДА. Тестот е анонимен и бесплатен, но сепак мал број на граѓани се решаваат да се проверат. Лекарите препорачуваат тестирање особено за ризични групи: лица кои имале сексуални односи без заштита, корисници на дрога, сексуални работници и слично.

Првите случаи на пациенти со ХИВ СИДА во регионот на Гостивар беа регистрирани во 2005-та година.

Први декември се одбележува под мотото „Како да дојдеме до нула“ што подразбира, нула ХИВ позитивни, нула заболени од СИДА и нула дискриминација кон заразените.