Гостиварец загина во сообраќајка на патот Маврово – Дебар

Шеесет и четири годишен гостиварец го загубил животот од повреди задобиени во сообраќајна несреќа која во саботата се случила на регионалниот пат Маврови Анови – Дебар. Во несреќата полесно е повредено уште едно лице.

Според информациите од СВР Тетово, несреќата се случила околу 23 часот во близина на месноста „Скудрињски продавници“ при што дошло до директен судар на два автомобили, „опел“ со гостиварски регистарски ознаки кој го управувал З.Л (64) и „бмв“ со струшки ознаки што го управувал дебранецот Е.И. (24).

Од силината на ударот, возачот на „опелот“ се здобил со тешки повреди по што како итен случај од дебарската болница бил испратен за болницата „Св Еразмо“ во Охрид. За жал по пат им подлегнал на повредите. Во несреќата било повредено уште едно лице, но тоа поминало со полсени повреди.

Ова е единаесетта жртва во сообраќајна несреќа на поширокото гостиварско подрачје од почетокот на оваа година.