13 февруари 2019-та, датум што го зави Гостивар во црно

Поминаа три години од страотната сообраќајна несреќа кај селото Ласкарци, во која загинаа шеснаесет граѓани на Гостивар и околните места. 13 февруари 2019-та, е црн датум за Гостивар и за Македонија, датум кој носи болни спомени, неизмерна тага и жалење.

Тригодишнината од несреќата денес ќе се одбележи со положување на цвеќе на местото на кобната несреќа и собир во малиот парк на плоштадот во Гостивар, најавија од гостиварската локална самоуправа, повикувајќи ги членовите на семејствата, пријателите на жртвите и сите други граѓаните, да се придружат на настаните.

На 13 февруари 2019-та година, автобусот на Дурмо Турс, кој тргнува кон Гостивар од скопската автобуска станица во 16 часот и 15 минути со 51 патник, излета од коловозот, ги проби банкините, падна и се преврте на стариот дел од патот.

Во несреќата животите ги загубија: Дејан Ристоски, Раметула Абдураими, Валдете Хамити, Јовица Трпевски, Бесим Фетаи, Онур Садику, Есат Емрули, Ајдин Исмаили, Бејза Узеири, Зоран Давидовски, Бобан Аврамовски, Трпана Јаневска, Павле Костоски, Арсе Арсоски, Ферди Касо и Ерза Османи.

За случајот се води судски процес во Кривичниот суд во Скопје, во кој шест лица се обвинети за тешки дела против безбедноста на луѓето и имотот во сообраќајот. Од Кривичен пред месец и половина соопштија дека за да премине во завршна фаза предметот се чека на супервештачење, неопходно за затворање на доказната постапка и донесување првостепена пресуда.