16 газди во Гостивар добиле финансиска помош, а не дале плата на работниците

Дури 306 фирми во земјава добиле финансиска поддршка за декемвриски плати, а работодавачите не ја исплатиле на вработените.

Директорката на УЈП Сања Лукаревска рече дека за овие работодавачи Управата за јавни приходи изготви и достави опомени и за неисплатената плата, а по истекот на рокот од опомената, против оние кои нема да ја исплатат платата ќе следи спроведување на постапка на присилна наплата на платата со блокада на паричните средства на нивните трансакциски сметки и пренос на средствата на сметките на вработените лица и на уплатните сметки за јавни приходи. Овие компании се различни дејности: трговија на мало, фирми што вршат подготовка на оброци и служење на храна, градежништво,  транспорт, трговија на големо, трговија на големо и мало со моторни возила и моторцикли и услужни дејности.

По региони најмногу фирми што не исплатиле плата се од Скопје 92 фирми, Тетово 63 и Гостивар 16.
Лукаревска соопшти дека по спроведените мерки и активности од страна на Управата за јавни приходи, намален е бројот на компаниите кои сеуште не ја исплатиле октомвриската и ноемвриската плата, и тоа за октомври е намалено од 179 на 11 компании, а во ноември од 245 на 24 компании. Октомвриска плата се уште не зеле 34 вработени, а во ноември 50 вработени. Кај овие компании во тек е постапка на присилна наплата на неисплатената плата од парични средства на трансакциска сметка. Намален е и бројот на компании кои не исплатиле плата за април, мај и јуни 2020 година. Така што по постапката за присилна наплата, со состојба на 2 февруари 2021 година уште не е исплатена плата за месец април од страна на 47 компании за 102 вработени, 33 компании за мај не исплатиле плата на 63 вработени и плата за јуни не исплатиле 54 компании за 145 вработени.

„Вкупниот број на компании кои сè уште не исплатиле плата за еден, за два или за сите три месеци (април, мај и/или јуни) е 109. За овие работодавачи доставени се детални податоци во Јавното обвинителство, за покренување на кривична постапка, и кај истите се извршени контроли во координација со Државен инспекторат за труд, за што ќе известиме во вторник наредната недела“, рече Лукаревска.