172 милиони денари за картички за бесплатна патарина за српските туристи

Владата на вчерашната седница усвои Информација изготвена од Јавното претпријатие за државни патишта и Министерството за транспорт и врски, во врска со изготвување на електронски картички (М-Смарт Кард) за патнички моторни возила на туристи од Република Србија кои би транзитирале на Коридор 10 за време на летната сезона во периодот од 15.06.2021 до 15.08.2021 година.

„Во оваа насока е задолжувањето на Министерството за финансии да префрли средства во износ од 172.000.000,00 денари за набавка на 200.000 М- Смарт Кард на сметката на Владата, а  ЈП за државни патишта да изврши сукцесивна испорака на предвидените количини на М- Смарт Кард. Се задолжува Јавното претпријатие за државни патишта, откако ќе заврши проектот, во случај на неискористени средства, истите да ги врати на сметката на Буџетот на Република Северна Македонија – Влада на Република Северна Македонија.“, известија од прес службата.

Министерството за внатрешни работи ќе биде задолжено за распределба на електронските картички на возилата со српски туристи кои ќе влегуваат во земјава преку Граничниот премин Табановце.

Ослободување на плаќање патарина на српските државјани за време на летната сезона е во знак на благодарност поради донираните вакцини против ковид.