2МФЛ: Гостиварските екипи во финишот на натпреварите до поволен резултат

Во 14-то коло одиграно викендов во Втората македонска фудбалска лига, ФК Гостивар ја совлада екипата на Дрита од Боговиње со 2:1, додека Вардар од Форино ремезираше со Кадино во Скопје 1:1.

ФК Гостивар во интересен натпревар со пресврт успеа да ја совлада екипата на ФК Дрита од Боговиње и се погрижи бодовите да останат во Гостивар. Гостите од Боговиње преку Амир Алији во 30-та минута го отворија резултатот со кој се замина на одмор. Гостиварци, во второто полувреме најпрвин преку Малиќ Белули во 58-та минута го израмнија резултатот на 1:1, за во самото судиско надополнување, односно во 92-та минута Христијан Кировски да им донесе триумф од 2:1 и нови три бода. ФК Гостивар со 27 бода останува на втората позиција на табелата зад екипата на ФК Скопје на која ѝ гостува во дербито на следното 15-то коло.

Екипата на ФК Вардар од Форино, исто така, во судиското продолжение од натпреварот на гостувањето во Кадино успеаа да избегнат пораз. Домаќините поведоа дури во 87-та минута преку Трипуновски од пенал, а форинци преку Шпед Асани во 93-та минута го израмнија резултатот за конечни 1:1. ФК Вардар Форино со 13 бода се наоѓа на осмата позиција на табелата. Во следното коло ја пречекува екипата на ФК Охрид.