300 социјални семејства од Гостивар добија таблети, компјутери и телефони за настава на децата

Во вонредна состојба кога образованиот процес  е организиран преку интернет, семејствата од социјален ризик се соочуваат со дополнителна мака: како на децата да им обезбедат услови за да можат да ја следат наставата. Во тој поглед, донациите се добредојдени и од голема помош.

Според податоците на општинскиот Сектор за образование, на гостиварското подрачје регистрирани се околу 900 социјално загрозени семејства чии деца поради немање соодветни електронски уреди, не можеле да учат. Преку донации од фирми, поединци и граѓански организации до сега биле обезбедени таблети, лап топи и смарт телефони за околу 300 семејства.

Вчера беа распределени 100 таблети, донација на тетовската фирма Еколог, а претходно гостиварската компанија Нани принт подари 55 компјутери. Organized Youth Association спроведе повеќедневна акција во која беа собрани 40  електронски уреди (телефони, таблети, компјутери и лаптопи), исто така наменети за ученици од ранливи семејства. Донации беа доставувани и од други компании.

Сепак, поради сиромаштија, надвор од образованиот процес во регионот на Гостивар, се уште остануваат ученици од околу 600 семејства.