46-та Галичка свадба – Марина и Огнен се венчаа во духот на вековните традиции

Галичник по 46-ти пат беше во центарот на вниманието со традиционалната културно-туристичка манифестација Галичка свадба. Обичаите и ритуалите се изведуваа два дена и се заокружија попладнево со венчавање на младенците, носење на невестата на вода и испраќање на тапаните.

Својата љубов во Галичник годинава ја крунисаа Огнен Караѓозовски и Марина Петровска, а церемонијата на венчавањето се одвиваше во црквата Свети Апостол Петар и Павле.

„Галичката свадба ја слави љубовта и традицијата во нашето мултикулурно општество. Кога се радуваме со свадбарите, истовремено се потсетуваме за богатството на нашето културно наследство преку автентичните обичаи, разнобојните носии и мијачкиот фолклор. На Огнен и Марина им посакувам многу слога, љубов и разбирање во нивниот иден заеднички живот. Посакувам радоста на едниот да се придодаде на другиот, а бремињата да им бидат двојно полесни, зашто бремето на едниот ќе го носи и другиот. Им посакувам да добијат и прекрасни дечиња со кои заедно ќе се радуваат“, рече претседателот, Стево Пендаровски, кој е покровител на годинешната манифестација.

Како и секоја година, Галичката свадба и овојпат собра огромен број на посетители и туристи од земјава и од стратство, кои уживаа во живописниот Галичник и изведбата на триесетина автентични свадбарски обичаи од мијачкиот крај.