Шест години од автобуската несреќа кај Ласкарци-Непребол за 16 изгубени човечки животи

Денес се навршуваат шест години од трагичната автобуска несреќа што се случи близу селото Ласкарци, во која животите ги загубија шеснаесет граѓани на Гостивар и околните места, а над 30 беа повредени. 13 февруари 2019-та година останува врежан како црн датум за Гостивар и за Македонија, датум на непребол и неизмерна тага.

Тој пеколен ден, автобусот на Дурмо Турс, кој тргнува кон Гостивар од скопската автобуска станица во 16 часот и 15 минути со 51 патник, излета од коловозот, ги проби банкините, падна и се преврте на стариот дел од патот.

Во несреќата животите ги загубија: Дејан Ристоски, Раметула Абдураими, Валдете Хамити, Јовица Трпевски, Бесим Фетаи, Онур Садику, Есат Емрули, Ајдин Исмаили, Бејза Узеири, Зоран Давидовски, Бобан Аврамовски, Трпана Јаневска, Павле Костоски, Арсе Арсоски, Ферди Касо и Ерза Османи.

Во сеќавањата и срцата на гостиварци остнуваат да живеат вечно. Во нивна чест во малиот градски парк на плоштадот има посебно место со 16 дрвца и табли со нивните имиња.

Пресудата за случајот беше донесена кон крајот на јануари лани. Обвинетите добија вкупно 39 години затворски казни.

Судечкиот совет при Основниот Кривичен суд Скопје го прогласи за виновен обвинетиот Дурмиш Белули, сопственик на компанијата „Дурмо турс“ и му изрече казна затвор од четири години, на одговорниот за транспорт во фирмата, Ремзи Мифтари казна затвор од шест години, а на тројцата вработени во станицата за технички преглед, Игор Ѓорѓиевски, Горан Дуковски и Јане Боваровски, кои се товарат за соучество во истото дело, им изрече затворска казна од по пет години. Најголема казна затвор од 14 години доби возачот на автобусот, Маноил Трифуновски.

На обвинетите им беше изречена и забрана за вршење професија и должност во времетраење од пет години.

Шестгодишнината од несреќата во Гостивар ќе биде одбележана со комеморативен собир и положување цвеќе.