79 годишен дебарчанец почина од коронавирус, во земјава има 26 новозаболени

Утрово се регистрирани 26 нови случаи на коронавирус во земјата, со што има вкупно 285 дијагностицирани пациенти.
„Информираме дека утрово на Клиниката за инфективни болести и фебрилни состојби во Скопје почина еден пациент на 79 години, од Дебар. Пациентот е дијагностициран позитивен на Ковид-19 на 23 март, а со влошена здравствена состојба хоспитализиран на клиниката во Скопје на 25 март.“, информираше Министерството за здравство.

Денес од инфективната клиника во Скопје биле испишани 9 пациенти (8 од Дебар и 1 од Скопје) кои на два контролни теста на Ковид-19 имале негативен резултат, а нивната здравствена состојба била добра.
Министерството најави дека целосен преглед за состојбата по градови ќе даде дополнително, бидејќи дел од потврдените се со работа во Скопје, но место на живеење во друг град, а анкетите се се уште во тек.
Со оглед на зголемениот обем на работа и информации и се поголемиот број на тестирања во повеќе лаборатории кои ги доставуваат своите извештаи до Институтот за јавно здравје, Министерството за здравство известува дека од утре 31 март, ИЈЗ ќе ја доставува статистиката на денот за бројот на новозаболени до 15 часот за што Министерството за здравство веднаш ќе испрати информација до медиумите.