Адеми: МОН поднесе жалба, пресудата не вели дека Таравари постапил законски

Пресудата на Управниот суд во ниту еден момент не вели дека градоначалникот на општина Гостивар постапил законски, реагира министерот за образование Арбер Адеми, откако Таравари објави дека Управниот суд ја уважил тужбата на Општина Гостивар и го поништил решението за одземање на ингеренциите за именување и разрешување на директори во училиштата.

„Судот ја уважил тужбата со образложение дека недостасувале дел од списите, односно сите списи не биле доставени, а некои биле нечитливи за судот (иако сите списи биле уредно доставени), па затоа не можел да ја утврди основата на решението за одземање на надлежностите. Врз основа на оваа пресуда, МОН може повторно да донесе исто решение или да поднесе жалба до Вишиот управен суд. Ние се решивме за втората опција и во понеделник е поднесено жалба со сите списи на предметот, а секако правдата треба да дојде на свое место.“, соопшти Адеми.

Од Министерството за образование велат дека незаконските дејствија и незаконските разрешувања на директорите на училиштата од страна на градоначалникот на Општина Гостивар утврдени од страна на Просветниот инспекторат и Второстепената комисија не можат да бидат покриени.