Адвокатската заедница во Гостивар донираше новогодишни пакетчиња за деца во социјален ризик

Во пресрет на новогодишните празнувања, во духот на споделување радости и подарување, Адвокатската заедница во Гостивар донираше пакетчиња за 40-тина деца од социјално загрозени семејства. Пакетчињата денеска во Центарот за социјална работа во Гостивар ги доставија претседателката на заедницата, Анета Наумческа и заменик претседателот Лирим Мустафи. Од таму службите ќе ги распределат кај дечиња од ранливи категории семејства.

„Подароците и донациите се секогаш добредојдени за дечињата во социјален ризик, особено за време на празниците. Се заблагодаруваме на Адвокатската заедница за овој убав гест и сигурни сме дека соработката во тој правец ќе продолжи и во иднина.“ изјави директорката на Центарот за социјална работа, Надица Величковска.

Адвокатите велат дека иницијативата за подарување на новогодишни пакетчиња почнале да ја спроведуваат од лани и дека тоа ќе прерасне во традиција.

„Адвокатите на ваков начин ја покажуваат хуманоста и социјалната одговорност, но што е поважно сакаме да ги поттикнеме и сите останати поединци, фирми, здруженија да донираат во рамки на можностите, на оние на кои им е најпотребно“, велат од  Адвокатска заедница Гостивар.