Агенцијата за храна апелира граѓаните да не јадат црн дроб од дивеч, најдени се олово и жива

– Во црниот дроб на дивечот, посебно кај дивата свиња, дивите птици и зајакот, утврдени се поголеми количини олово, кадмиум и жива поради што се препорачува овој орган да не се консумира. Особено ова важи за ловџиите кај кои, традиционално, по ловот, најпрво се јаде црниот дроб како вид гоштевање, нивно и на семејството, изјави директорот на Агенцијата за храна и ветеринарство Зоран Атанасови.

Најголеми отстапувања во присуството на тешки метали во црниот дроб имало кај дивечот во реоните на Гевгелија, Велес, Куманово, Прилеп и Струга, додека само лани, во четири случаи се утврдени повеќе тешки метали и во мускулното ткиво. Се претпоставува дека присуството на тешки метали доаѓа од почвата, соопштија од Агенцијата.

Две ловни друштва пријавиле и појава на трихинелоза кај дивечот, а се следат и бруцелозата, птичјиот грип, африканската и класичната свинска чума, како и беснилото кај лисиците. Трихинелозата, е паразитарно заболување кое може да се пренесе од животните на луѓето. За да се заштити населението, не треба да јаде такво месо. Сепак, термичката обработка на високи температури е еден вид заштита. Препораките се, заловениот дивич да се однесе на испитување.

– Онаму каде што утврдивме присуство на трихинела, кај четири случаи, труповите термички ги обработивме и ги уништивме со закопување во земја. Тоа е најбезбедниот начин. Воопшто не се пуштени во промет, подвлече Атанасов.