Ајам Чемани – Најцрните кокошки на светот

Црната боја не е невообичаена за животните – некои мечки се црни, кучиња, мачки, птици…, но пособено се истакнува пилешкиот вид Ајам Чемани: тие се црни и однадвор и одвнатре. Нивните перја се црни, клуновите, канџите, па дури и месото, коските и сите внатрешни органи. Единственото нешто што не е црно кај овие кокошки е крвта, која сепак е толку темна што луѓето честопати мислат дека е и црна.

Зборот „Ајам“ во Индонезија значи „пилешко“, а „Чемани“ значи „целосно црно“. Оваа необична раса потекнува од Јава во Индонезија, а во Европа пристигнува дури во 1998 година, кога привлекоа големо внимание кај љубителите на живината поради нивниот изглед и генетика. Згора на тоа; Ајам Чемани се еден од најскапите видови кокошки на светот – едно црно пиле чини до 2.500 долари.

Ајам Чемани се црни благодарение на генетската карактеристика позната како „ фибромеланоза“ што помага во забрзаното формирање на црни пигментни клетки. Генот што предизвикува фибромеланоза е мутација која постои во Азија повеќе од 800 години и вклучува неколку видови живина, како што е шведската црна кокошка или Сварт Хона, која ги има истите црти како Ајам Чемани.

Во Азија, месото од ова пилешко е пособено ценето бидејќи во некои региони се верува дека поседува мистична моќ. Тие понекогаш се жртвуваат за време на породувањето затоа што се верува дека им носат среќа на мајката и детето, но исто така се жртвуваат и за време на други важни настани во животот бидејќи генерално се верува дека носат добра среќа.