Акција за засадување дрвца во Гостивар: Повеќе зеленило и повисока еколошка свест

Локалната самоуправа на Гостивар денес организираше акција за засадување на дрвца, по повод Светскиот ден на екологијата, 21 Март. На различни локации низ градот засадени се четириесет дрвца, а во акцијата во градскиот парк учествуваше и градоначалникот Ваљбон Лимани.

„Поради случувањата во Кочани одбележувањето на Светскиот ден на екологијата беше одложено за денес. Симболично засадуваме 40 дрвца кои се донација од наш сограѓанин кој живее во Швајцарија. И понатаму ќе продолжиме со исто темпо со засадување, со цел да го зголемиме бројот на дрвја и да ги прошириме зелените површини.“, изјави Лимани и упати апел до граѓаните за повисока еколошка свест.

„Апел до граѓаните е да ги чуваме зелените површини и да се грижиме за нив, затоа што тие се наше богатство. Како општина ние ќе преземаме мерки и со нашите инспектори, а се надевам дека во идинина доколку поминат измените на Законот за локална самоуправа ќе имаме и општинска комунална полиција која ќе потпомогне да ги зачуваме зелените површини и се друго што е од јавен интерес.“, рече градоначалникот.

Денешните активности беа реализирани во соработка со Црвениот крст на Гостивар, Јавното претпријатие за паркинзи и зеленило и средните училишта.