Акцијашите од Гостивар ја уредуваат патеката од Беловишки Мост до Асан Чешма

Здружението на акцијаши од Гостивар деновиве почна со активности за уредување на патеката од Беловишки Мост до Асан Чешма. Со акцијата е предвидено расчистување на патеката, поткастрување на околната вегетација која попречува движење, собирање на отпадот како и маркација.

„Ова е наша прва акција оваа година. Сакавме да спроведеме чистење и маркација на патеката за попријатно и полесно движење на рекреативците кои ја користат“, велат од Здружението.

Од таму најавуваат и други акции на поширокиот гостиварски регион, кога ќе се подобрат временските услови.

Гостиварското здружение на акцијаши лани спроведе повеќе активности за уредување на споменици и обележја од НОВ во Ново Село, Аџина Река, Никифорово, Леуново и др. Негови членови, исто така учествуваа и во работна акција во велешко Горно Врановци и во Нови Пазар, Србија.

Здружението постои околу шест години.