Ако не одат на обука, членовите на избирачките одбори нема да добијат пари за изборите

Државната изборна комисија годинава воведе ново правило врзано за исплатата на надоместокот што го добиваат членовите на Избирачките одбори за својот ангажман на изборите. За членовите како и во претходните изборни циклуси се организираат едукативни обуки на кои тие се запознаваат со своите обврски и начинот на работа, за што добиваат уверение. Новина е што без посета на обуката, односно без уверението, членовите на Избирачките одбори нема да можат да добијат надоместок.

Надоместок ќе добијат само тие членови кои ќе посетуваат едукација и ќе добијат уверение за учество, се наведува во Прирачникот за едукација на ДИК. Од друга страна, неучеството на работилницата и недобивањето уверение не ги ослободува од обврската да бидат член на Избирачкиот одбор. Што значи дека ќе мора да работат на денот на изборите, но нема да добијат надоместок.