Акција за чистење и средување во ромската населба „Дупка“

На иницијатива на жителите на ромската населба “Дупка” во Гостивар, денес се спроведува акција за чистење, во која се вклучи Јавното претпријатие “Комуналец”.

Локалните жители ги чистат отпадоците и го собираат на едно место, а јавното претпријатие го превезува сметот и врши израмнување на патот што води до населбата и расчистување на каналoт за атмосферски води.

Во ромската населба „Дупка“ владеат субстандардни услови за живот, без никаква уредена инфраструктура. Во февруари годинава, беше најавено дека мизерната глетка на оваа населба постепено ќе се менува, со координирани мерки на локалните и државните институции при што најпрво ќе се изработи акционен план, а за 2 до 3 години ќе се комплетира инфраструктурата.

Од Општина Гостивар велат дека ги поддржуваат и помагаат сите еколошки акции на жителите од градските населби и од селата и дека се посветени на создавање нормални услови за сите граѓани кои живеат на нејзина територија.