Аларм од туристичките работници, ќе се спаси ли сезоната?

Неопходна е итна поддршка и агресивна промоција на туристичката понуда, за да се спаси барем дел од годинашната туристичка сезона и да се овозможи поповолна позиција во 2022-ра година. Ова е констатацијата искажана на прес конференцијата на Здружението на угостителството и туризмот при Стопанската комора на Северна Македонија.

„Во периодот што следи, од клучно значење ќе биде и зајакнувањето на односите со поголемите странски тур-оператори со кои се негува традиционална соработка преку директна комуникација на сите нивоа. Истото се однесува и на односите со авионските компании кои оперираат кон и од Северна Македонија. Ваучерите за социјалните категории граѓани се добра мерка која ќе има некаков бенефит, но нема да биде доволна да го поддржи туризмот во обликот како лани. Земјава ги губи не само туристите, туку и позициите како туристичка дестинација. Нема чартери, нема автобуси во доволен број, ниту доволно организирани патувања кон Северна Македонија. Слабеат позициите на државава кај традиционалните пазари, додека на регионалниот не се зајакнуваат, а уште потешко може да се размислува за нови пазари.“, беше речено на пресот.

Потпретседателот на Здружението, Александар Кузманоски истакна дека интерес за земјава како туристичка дестинација има, но недостасуваат информации за проток, за влез и излез.

„Ние континуирано и укажуваме дека на страницата на МНР, не постои информација на англиски јазик за условите за влез во државата во услови на Ковид-19 кризата. Како ние да им објасниме на гостите, а не се работи само за туристи, туку и за бизнис. Мора редовно да се апдејтираат податоците за ние готови да ги преземеме и да ја промовираме државата“, истакна Кузманоски.