Американец починал од болест која се поврзува со е-цигарите

Најновите истражувања и искуства во медицината, потврдуваат дека електронските цигари не се безопасни, напротив носат голем ризик за здравјето на човекот. Во Америка веќе е пријавен прв смртен случај, кој лекарите го поврзуваат со користење на е-цигари.

Пациент во Илиноис развил тешка белодробна болест, а напорите на лекарите да го излечат останале безуспешни и тој во петокот починал. Американските медиуми јавуваат дека ова се случува во период кога во државата се регистрираат повеќе пациенти со респираторно заболување од тешка форма, а за кое се сомневаат дека потекнува од алтернативните цигари. Се работи за бројка од 193 заболени. Кај нив се јавиле потешкотии во дишењето, голем замор, јако кашлање, а некои имале и дијареа.

„Тежината на болеста е алармантна и од ова мора да се извлече порака дека  користењето е-цигари може да биде опасно“, вели д-р Нгози Езике, директор на одделот за јавно здравје во Илиноис.