Анчелоти по триумфот над Сити: Историјата на клубот ни помага да се бориме до крај

Тренерот на Реал Мадрид, Карло Анчелоти го кажа своето видување за синоќешната победа (3:1) над Манчестер сити во реванш полуфиналниот натпревар од Лигата на шампионите.

– Не можам да кажам дека веќе сме навикнати да победуваме на овој начин, но истото се случи и во пресметката со Челзи и ПСЖ. Ако прашате како успеваме да го направиме ова, ќе ви одговорам дека историјата на клубот ни помага да продолжиме да се бориме дури и кога се чини дека се е веќе завршено. Натпреварот беше речиси загубен, но сепак успеавме да го направиме последниот чекор. Имавме добар натпревар против силен противник. Постигнатиот гол, кој ни овозможи да израмниме, ни даде самодоверба во судиското надополнување и ни донесе психолошка предност. Драго ми е што ќе играме во финалето против уште еден силен противник. Навикнати сме на вакви натпревари. Нè очекува неверојатна фудбалска вечер, изјави Анчелоти.

Реал победи со 3:1 по продолженија, откако основните 90 минути завршија со 2:1. На првиот меч одигран во Манчестер, Сити победи со 4:3.

Во финалето Реал Мадрид ќе се соочи со Ливерпул. Овој натпревар е закажан за 28 мај во Париз.

Додека тренерот на Манчестер сити, Пеп Гвардиола, жали за пропуштената шанса неговиот тим да обезбеди пласман во финалето на Лигата на шампионите до кое го делеа неколку минути.

Сити синоќа загуби на госувањето кај Реал со 3:1 по дополнителни 30 минути, откако основните 90 завршија со 2:1.

– Бевме блиску, но на крајот не се пласиравме во финалето. Сè е едноставно. Во првото полувреме не одигравме доволно добро, но немавме посериозни проблеми. По постигнувањето на нашиот гол одигравме подобро. Го најдовме нашето темпо, нашата игра, играчите се чувствуваа удобно. Реал во последните 10 минути нападна со сите сили, а ние настрадавме. Многу од нивните играчи влегоа во шеснаесетникот, меѓу кои Милитао, Родриго, Винисиус, Бензема. Нафрлија и погодија два пати. Не ја прикажавме нашата најдобра игра, но тоа е нормално, бидејќи е полуфинале. Играчите го почувствуваа притисокот и сакаа да успеат. Фудбалот е непредвидлив. Треба да го прифатиме. Треба да се преиспитаме и да се вратиме назад. Имаме уште четири натпревари пред нас во домашното првенство, изјави Гвардиола.

Шпанецот по шести пат е елиминиран во полуфиналето на Лигата на шампионите со што го повтори антирекордот на Жозе Мурињо.