Апел: Да не се палат огнови по полињата!

Во период кога се интензивираат подготвителните активности на земјоделците за престојната сеидба во полошкиот регион, надлежните апелираат на внимателност и одговорност при работа на отворено.

„Забрзано се чистат нивите, меѓите и стрништата, забележително е зголемена вкупната фрекфренција, особено по регионалните и локалните патишта. Имајќи ги во вид ваквите околности, Секторот за внатрешни работи Тетово апелира до граѓаните да бидат крајно внимателни кога работат или се движат на отворен простор.  Ова, пред се` се однесува на оние кои се ангажирани во полето, до кои се апелира да не палат огнови, зашто пламените јазици брзо и лесно можат да се прошират, посебно кога е ветровито, бидејќи запаленото, потоа, тешко може да се контролира„, се наведува во соопштението од СВР.

Од таму советуваат граѓаните, исто така, да се воздржат од фрлање на догорчиња и неизгаснати отпушоци.

Намерното предизвикување  шумски пожар претставува кривично дело за кое е предвидена и затворска казна од осум до десет години, зависно од местото, неговите размери и крајните последици.

Покрај ова, на земјоделците им се советува,  внимателно да ја користат механизација, навреме да ја проверат техничка исправност и да ја управуваат само лица со положен возачки испит.

Секторот за внатрешни работи најавува дека во соработка со другите надлежни институции на подрачјето, ќе презема адекватни превентивни и други мерки, со цел навреме да се пресретнат можните причини за избувнување пожари, сообраќајни несреќи со учество на земјоделска механизација и друго.