Апел до моторџиите: Носете кациги и почитувајте ги правилата

Секторот за внатрешни работи Тетово апелира до мотоциклистите, задолжително да користат заштитна опрема кациги, да поседуваат возачки дозволи, редовно да ја проверуваат техничката исправност на моторите и навреме да ги регистрираат. Од полицијата нагласуваат дека потсетувањето доаѓа во време кога бројот на мотоциклисти по патиштата и улиците во Полошкиот регион значително е зголемен и со цел да не се доведува во прашање сопствената и безбедноста на другите учесници во сообраќајот,

„Покрај ова, им се советува, исто така, да не седнуваат на мотоцикл со необновени полиси за осигурување, посебно доколку станува збор за мотоцикл до 50 „кубици “, велат од СВР.

Паричната казна за некористење заштитни шлемови изнесува 50 евра,  за управување мотоцикл без возачка дозвола 300 евра, за истечена регистрација од 100 до 500 и за необновена осигурителна полиса 100 евра во денарска противвредност.

Секторот за внатрешни работи Тетово наскоро ќе стартува со имплементација на посебен превентивно-едукативен проект „Безбедни на мотор“, со кој ќе бидат опфатени учениците од прва година во тетовските и гостиварските средни училишта.