Апел до земјоделците: Не палете стрништа без контрола, демне опасност од пожари

Во периодот на започнување на првите подготовки за претстојната пролетна седидба, кога има зголемена раздвиженост на нивите во полошко и интензивно чистње на отпадоците, забележливи се појави на палење на стрништа и сува вегетација (трева, жбунови и слично), најчесто без непосредна контрола со што се предизвикуваат несакани последици, алармира полицијата.

„Токму затоа, Секторот за внатрешни работи Тетово  апелира до земјоделците, но и до сите други да бидат постојано внимателни ако се движат или работат во полето и посебно да не палат огнови, кои брзо можат да се прошират, особено ако времето е ветровито. Во спротивно ќе се соочат со ригорозни законски санкции, односно со соодветни поднесоци и ќе им бидат запретени затворски казни од 6 месеци до 8 години, зависно од видот на пожарот и другите околности и последици.“, соопшти СВР.

Од таму нагласуваат дека преземаат координирани превентивни и други мерки, навреме да се пресретнат можните причини за пожари, а во наредниот период ќе бидат засилени и планираните контролни активности на поширокото подрачје.