Асфалтиран патот до манастирот „Преображение Христово “ во Циглана, полесно и побезбедно до храмот

Во пресрет на големиот христијански празник Преображение Христово, кој се одбележува на 19 август, се заокружија градежните работи за уредување на патната инфраструктура која води до манастирот „Свето Преображение“ во гостиварската населба Циглана. Патот до храмот во должина од 210 метри и 7 метри ширина е целосно асфалтиран, со што значително се олеснува пристапот како за верниците и туристите кои сакаат да го посетат светото место, така и за екипите кои ги спроведуваат градежните активности за доизградба на манастирот.

„Манастирот деновие доби асфалтиран пат по кој добронамерниците ќе можат полесно и побезбедно да го посетат ова место кое треба да ги зближува луѓето, вербата во Бога и пожртвуваноста на локалното население годиниве наназад придонесе манастирот полека да го добива својот лик, патот беше една од препреките која доста го отежнуваше функционирањето. Изразуваме искрена благодарност до сите кои се вклучија и придонесоа за надминување на овој проблем“, велат од иницијативниот одбор за изградба на манастирот.

Темелите на манастирот, кој е прво православно светилиште што се гради во Гостивар после еден век, беа осветени во 2014-та година.

На 19-ти август, во манастирот во изградба во населба Циглана, традиционално се одржува сенароден собир во чест на празникот Преображение Христово.