Астмата – се позастапена болест кај гостиварци

Астмата се почесто ги напаѓа граѓаните од гостиварскиот регион. Точна бројка колку пациенти се заболени не може да се определи, со оглед на тоа што крајната дијагноза се поврдува во Скопје, но искуството на лекарите во Астма центарот во гостиварската болница покажува растечка тенденција на оваа болест. Во центарот, кој е отворен пред околу седум  години, се врши спирометрија (мерење на белодробниот капацитет), што е првиот чекор во откривање на астмата. Минатата година, спирометрија била направена на 3.705 граѓани од гостиварскиот регион. Во првите четири месеци од оваа година, на овој апарат поминале 1.410 пациенти.

Пулмолозите препорачуваат контролни прегледи кај лицата кои се сомневаат дека имаат симптоми на астма. Тие велат дека ако болеста се открие навреме и правилно се третира, може да се држи под контрола и да не му создава проблеми на пациентот во секојдневниот живот и обврски. Најчести симптоми се отежнато дишење, кашлица, свирење во градите, стегање во градите. Карактеристична кај болните е реверзибилноста и варијабилноста на овие симптоми, тие може да имаат повремени епизоди на гушење и периоди на нормално дишење.

Причините за појава на болеста не се докрај разјаснети, но познато е дека гените играат улога во комбинација со факторите од животната средина- изложеност на алергени (мувла, полен, алергени во храна), прашина, чад од цигари, загаден воздух, лекови и слично.

Првиот вторник од месецот мај, секоја година, се одбележува како Меѓународен ден за борба против астмата, која е една од најчестите хронични болести на светот. Статистиката покажува бројка од 350 милиони заболени во светски рамки. Во Македонија од астма боледуваат околу 90 илјади граѓани.