Бадникова поворка по петти пат во Гостивар – дечињата создадоа празнична атмосфера низ улиците

Дечињата создадоа вистинска празнична атмосфера и расположение низ гостиварските улици на Бадниковата поворка. Најмалите гостиварци со песна го најавија Христовото раѓање и ги стоплија срцата на сите верници со возобновената православна традиција.

Децата како симболи на ангелите со ѕвезди во рацете, тргнаа од црквата „Пресвета Богородица“ на градскиот плоштад, поминаа низ улиците „Илинденска“ и „Гоце Делчев“ и завршија во црквата „Св.Петка“, кај железничката станица. Носејќи ја Витлеемската пештера на чело на поворката, ја проширија радосната вест за раѓањето на спасителот меѓу верниците. Придружувани од свештенослужителите од гостиварското архиерејско намесништво, со радост и со гордост ја пееја коледарската песна Вечниот Бог.

Бадниковата поворка во Гостивар годинава се одржа по петти пат. Настанот го организира црквата „Пресвета Богородица“ со благослов на митрополитот Г.Јосиф и поддршка на Македонската Православна Црква – Охридска Архиепископија. Прославувањето на Бадник во Гостивар продолжува со вечерна богослужба и осветување на бадниковите гранчиња.