Багателните цени на становите во Грција, магнет за Македонците

Кризата во соседна Грција удира врз пазарот на недвижности. Цените за купување станови и деловен простор достигнуваат неверојатни намалувања. Увидувајќи го интересот кај македонските граѓани, продажба на станови нудат и некои домашни агенции за недвижности.

Се разбира, цената по квадратен метар многу зависи од локацијата и регионот. Но , дека има багателни понуди говори и фактот што во предградие на Солун, мал стан до 40 квадрати, може да се купи за 10 до 15 илјади евра. Евтини апартмани има и во делови на Атина, главно во квартови каде зградите се постари и е потребно реновирање. И таму, за цена до 15 илјади евра може да си купите стан.

Секако, далеку поскапа е квадратурата во туристичките селца и малите крајбрежни градови, каде цената на метар квадратен покрај плажа е до две илјади евра.

Македонските граѓани, сепак треба да знаат дека освен одредената цена на станот, при купопродажба имаат и други трошоци: преведувач, данок за пренос на сопственост, нотар, агенциски провизии, упис на сопственост и други. Така на пример, за стан од 40 квадрати, кој чини 30 илјади евра, за дополнителните трошоци ќе треба да обезбедите уште 3.500 до 4.000 евра.