Бесплатни обуки: Можност за невработените да ги усовршат информатичките вештини

Невработени лица со основни познавања од информатичките технологии, и желба да  ги надградат и да се стекнат со меѓународни сертификати можат да се пријават за бесплатна обука за напредни ИТ вештини. Агенцијата за вработување го отвори огласот на 23 јануари, а пријавувањето е во тек се додека не се формираат групите.

Право на учество имаат кандидати кои се евидентирани на листата на невработени лица и имаат завршено средно или високо образование.

„Обуките ќе се спроведуваат во период од 3 до 6 месеци од денот на формирање на конечните ранг листи вклучувајќи настава со користење на официјална литература, подготовка на кандидатите за сертификација и спроведување на испити за стекнување со меѓународно признат сертификат. Овие обуки ќе ја зголемат вработливоста на 100 невработени лица во Македонија и ќе обезбедат можност за стекнување на професионални вештини и квалификации за одредени работни места кои се барани на пазарот на трудот.“, стои во огласот.

Пријавувањето на заинтересираните се врши во Центрите за вработување каде се евидентирани како невработени лица.