Бесплатно микрочипирање на миленичињата во Гостивар вршат три ветеринарни друштва

Агенцијата за храна и ветеринарство, во соработка со ветеринарната комора на Република Македонија од први септември започна со бесплатното микрочипирање на домашните миленици. За таа намена набавени се вкупно 100 илјади микрочипови.

Агенцијата ја објави листата на ветеринарни друштва со кои е склучен договор за микрочипирање. На листата од Гостивар се наоѓаат три ветеринарни друштва кадешто граѓаните може да се обратат за вградување на микрочип на својот домашен миленик: Ветеринарна станица Труст Вет, АГ-ЕР-ВЕТ и Нова Вет. Договор е склучен и со Вет Градец во село Градец.

„Сопствениците на миленици масовно да ја искористат оваа еднократна донација. Кампањата ќе трае до 31 март идната година, додека не се потрошат набавените микрочипови, а ќе се спроведува по принципот „прв дојден, прв услужен“, апелираа од Агенцијата.

Процесот на микрочипирање е безболен. Микрочипот е мал електронски уред и содржи информации за сопственикот на миленикот, расата на животното, полот, за тоа дали е вакцинирано и кога е третирано со средство против паразити. Микрочипирањето е бесплатно, а сопствениците ќе треба да платат само 120 денари за издавање на пасош за домашен миленик, што ќе можат да го употребат при патување надвор од државата.

Секој сопственик има законска обврска да го микрочипира својот домашен миленик. За неисполнување предвидена е парична казна од околу 2.000 денари.