Без право на грешка: КК Гостивар од 17 часот го пречекува Еуроникел

После двата порази во серија, првиот во КУП натпреварувањето (84-75), вториот во првиот дуел од Плеј-офот (90-79) од екипата на Еуроникел, денеска КК Гостивар го игра вториот натпревар во завршниот Плеј-оф против оваа екипа.

Гостиварските „бело-сини“ немаат никаков простор за калкулирање, ситуацијата е јасна. Победа во овој дуел значи израмнување на 1-1, односно изборување за мајсторка за полуфинале, пораз би значело крај за гостиварци во сезоната 2020/2021.

Дополнителен проблем во најважниот дел од сезоната во таборот на Јончевски, се отсуството на Димитриевски и Вокер, кои поради повреди се надвор од протоколот, како и Тасовски кој не е целосно фит. Што значи со само седум сениори во ростер и младинците на клубот, КК Гостивар ќе се обиде да ја продолжи неизвесноста за патникот во полуфинале од оваа двојка. Екипата на Еуроникел во најсилен состав ќе допатува денес во Гостивар.

Натпреварот е закажан за 17 часот, и се игра без публика. Пред почетокот на натпреварот ќе објавиме линк на кој ќе може да го следите четвртфиналниот дуел.