Без прејадување и пијанчење за празниците!

Внимателно со храната и одговорно со алкохолот. Тоа се главните совети на лекарите за време на празниците во кои богатата трпеза и пиењето се неизбежни. За да не го шокирате организмот и за да го одржите стабилен, не смеете да претерувате со ништо.

Да, на домашните кифлички, руската салата, сармите и тортите ретко кој може да им одолее, сепак за доброто на нашето здравје, мора да се има мерка. Тоа што за Нова година, Бадник и Божик се подготвуваат најразлични примамливи јадења, не значи дека треба да се заборави основното правило во исхраната – умереност.  Ако се храниме умерено ќе избегнеме непосредни здравствени тегоби, како што се чувство на надуеност, или болки во стомакот, но и долготрајни последици како покачување на крвниот притисок и проблеми со варењето кое големиот внес на храна дополнително го отежнува.

Ако сепак се прејадете, следните совети може во извесна мера да ви бидат од помош: Изедете малку ананас или пак испијате чаша јогурт. Овие намирници го подобруваат варењето на храната. Добро дејство во тој правец има и зелениот чај. Филџан зелен чај за време или после јадење ќе помогне вашето тело да се ослободи од акумулираните масти и холестарол.

Што се однесува до алкохолот, препораките на лекарите се една до две чашки жесток алкохол, или две до три чашки ако се пие вино или пиво. Алкохолот особено е опасен при студено време, а прогнозите се дека вечерва температурите ќе паднат до -10 степени.  На конзумирањето алкохол посебно внимателни мора да бидат младите кај кои и мала количина пиење може да предизвика проблеми.

Бидете паметни за да си уживате во празниците. Среќна Нова!