Бигорскиот манастир го слави својот патрон

Со свечена архиерејска богослужба, вечерва во Бигорскиот манастир започнува чествувањето на патронот на ова древно светилиште. Според најавите, утре (11 септември), во 7.30 часот ќе започне утрената богослужба, а во 8.45 часот ќе започне светата архиерејска Златоустова литургија, со која ќе чиноначалствува митрополитот дебарско-кичевски, г. Тимотеј.

„Ја имаме големата чест и радост, во името на Христовиот Пророк и Крстител, да ги поканиме сите благочестиви православни Христијани да се присоединат кон неговото големо торжество, бидејќи тој, во денот на својот најголем празник Усекновение, е особено благодатно присутен и преку својата славна и чудотворна бигорска икона ги слуша и исполнува молитвите на оние коишто со љубов и вера го повикуваат. Тоа е денот кога „најголемиот меѓу родените од жена“ ја излева својата од Бога добиена благодат врз сите коишто ревносно го чествуваат неговиот спомен.“, стои во поканата од Бигорското братство.

Традиционално, по повод манастирската слава, во светилиштето престојуваат голем број верници од сите делови на земјава.

Свечената богослужба вечерва почнува во 18.30 часот.