Благодарница од општина Гостивар за хероите од Ласкарци

Претставници од Месната заедница од селото Ласкарци, чии жители први притрчаа во помош при трагичната автобуска несреќа на 13 февруари, денес беа во општина Гостивар. Градоначалникот Арбен Таравари им врачи Благодарница и упати огромна благодарност во име на сите граѓани, за пожртвуваноста и хуманоста на жителите кои помогнаа да се спасат човечки животи.

„Ноќта од тринаесетти февруари беше трагична вечер за Гостивар и за Македонија. Ние секогаш ги спомнуваме 15-те жртви, но многу важна ни е таа бројка од 38 луѓе кои се живи и повеќето од нив се во своите домови. Луѓето од Ласкарци најмногу придонесоа за тоа, тие се бореа за да спасат 38 животи. Од срце им благодарам. Тие одржаа лекција за хуманост и солидарност, како луѓето треба да помагаат едни на други“, изјави градоначалникот.

Претседателот на месната заедница на Ласкарци, Самед Мисини рече дека се` уште се потресени и растревожени од трагедијата. „Луѓето од селото го дадоа својот максимум за да помогнат. Сите сме длабоко погодени од големата несреќа и тешко е воопшто да се зборува за тоа“, рече Мисини.

Таравари најави дека во текот на утрешниот ден ќе го посети местото на несреќата и селото Ласкарци за лично да им се заблагодари на спасувачите.