Блокадата на Русино ќе продолжи, следуваат информативни средби за конечна одлука

Пристапот до Русино ќе биде блокиран и во следните денови. Граѓанската иницијатива „Стоп Русино, чист воздух за Гостивар“ реши рампата да остане спуштена за камиони со отпад дополнителни десет дена. Велат дека од вечерва на полноќ нема да ги пропуштаат ниту камионите од гостиварски „Комуналец“.

„На почетокот надлежните реагираа, спречија горење, затрупуваа, еве се поставија и камери. Очекуваме до понеделник да се овозможи следење на состојбата на интернет. Но, сепак последните денови повторно се случуваат пожари, отпадот чади, се шири непријатна миризба. Наша одлука е блокадата на Русино да продолжи, вклучително и за камионите од Гостивар. Во меѓувреме се одржуваат информативни средби и состаноци за да се разгледа состојбата, можностите, понудените решенија, постојниот проект и да се донесе конечна заедничка одлука“, рече Марија  Спасовска од Граѓанската иницијатива.

Доцна попладнево на местото на блокадата се одржа средба на која претставници од проектот за Управување со отпад , што го финансира Швајцарската Влада и од Центарот за развој на полошкиот плански регион, информираа за планираните зафати во склоп на проектните активности.

На прашањето на граѓаните дали и кога Русино може да се затвори, тие одговорија дека тоа е сложен процес и не може да се направи преку ноќ. Според нив најдоброто решение е стандардизирање на Русино и профункционирање на регионалното претпријатието за менаџирање со отпадот.

„ Самото затворање на депонијата опфаќа процедури на затворање и инкапсулација на отпадот. Ако во овој момент имаме алтернативна локација и ја напуштиме депонијата, таа ќе продолжи да загадува. За да престане да загадува, постои начин како се инкапсулира депонијата  и како после тоа се контролира. Не е доволно само да ја затворите. Неопходно е минимум 10 години после затворањето да ја мониторирате и да интервнирате доколку се појавуваат одредени нус последици“,  беше речено на состанокот.

Граѓанските активисти, кои од 2 август ја организираат блокадата на Русино, се залагаат за затворање и дислокација. Кај граѓаните постојат нејасности и недоверба, доколку се прифати швајцарскиот проект дали обврските ќе се реализираат во целост за санитарна депонија и како што е предвидено, планско затворање за 8 години.