Блокирани паркинзите во Гостивар, најавена акција за расчистување

Снегот и ниските температури кои владееа изминатиот период го блокираа зонското паркирање во Гостивар. Речиси 50% од паркинг местата низ градот не можат да се користат. Некои автомобили таму стојат непомрднати цел месец, што им ја отежнува работата на службите да го исчистат просторот и да ги оспособат паркизните.

Работници на гостиварското Јавно претпријатие за паркиралишта од почетокот на неделава работат на расчистување на насобраниот снег на паркинзите. Во функција ќе биде ставено и пајак возилото кое ќе ги подигнува автомобилите, што ги заробиле паркинг просторите со недели. Првата ваква акција планирано е да се спроведе во вечерните часови, а ќе се продолжи и во текот на наредните денови.

Од претпријатието апелираат до граѓаните, да ги отстранат возилата од паркинзите. „Од навечер ќе бидеме на терен и интензувно ќе работиме на расчистување и оспособување на паркинг местата. Особено на булеварите „Гоце Делчев“ и „Илинденска“. Затоа апелираме граѓаните чии возила стојат на исти места цел месец, да ги тргнат навреме“, вели Мемет Емро, директор на ЈП за паркиралишта во Гостивар

Возачите чии автомобили во акцијата за расчисување ќе ги подигне пајак службата, ќе си платат соодветна казна.