Бочварски најави почеток на постапката за проширување на патот Тетово-Гостивар

Еден од приоритетите на новата Влада во инфраструктурата ќе биде проширувањето на патот Тетово-Гостивар, најави денес министерот за транспорт и врски, Благој Бочварски. Овој патен правец е многу фреквентен, а претесен и незаштитен, поради што честопати се случуваат сообраќајни несреќи, гужви и застои.

Министерот истакна дека ќе се спроведат и други проекти и западниот коридор 8 ќе се претвори во модерна патна врска.

„Ќе започнеме со постапка за проширување на автопатот од Тетово до Гостивар, истовремено вршиме проектирање за изградба на нов автопат од Гостивар до Кичево, со што цел западен Коридор 8 ќе биде една модерна врска.“, рече Бочварски.

Според претходните најави, патот Тетово-Гостивар ќе стане стандарден автопат со по три коловозни ленти во еден правец. Лентите ќе бидат широки од 2,5 метри до 3,75 метри.

По оваа делница, којашто е долга околу 22 километри, просечно дневно минуваат околу 13 илјади возила. Од пуштањето во употреба на патот во 1996-та година, до сега не се извршени позначајни зафати за негова реконструкција.

Голем проблем за возачите претставуваат и бездомните животни, кои излегуваат на коловозот. Заштитната ограда што треба да ги спречува во неконтролираното движење честопати е мета на крадци.