Богојавленското чествување во Бигорски почнува утре, тече пријавување за вадење на светиот крст

Со вечерна богослужба утре (17 јануари) почнува Богојавленското чествување во древното македонско светилиште, Бигорскиот манастир. Богослужбата е најавена со почеток од 16 часот, сеноќното бдение во 23 часот, додека Богојавленскиот голем водосвет во манастирската фијала ќе се изврши во 4 часот наутро. На ден Водици (19 јануари) во 8 часот ќе биде отслужена Божествена златоустова литургија во храмот „Пресвета Богородица“ во Ростуше, од каде во 9 часот ќе тргне литијата кон Ростушки мост на реката Радика за положување на светиот крст.

„Со чинот на осветувањето на богојавленската вода и полагањето на крстот во водите, се симболизира ослободувањето од гревот што Христос му го донесе на родот човечки. Во тој миг се случува осветување на сите води и секој што ќе се допре или пие од таа осветена и облагодатена вода, го чувствува Божјиот благослов, се исполнува со голема сила и му се дава духовно и телесно здравје, но само доколку со вистински страв Божји и побожност пристапува кон оваа голема тајна. Затоа е многу важно учесниците во чинот на полагањето на крстот во водата претходно да учествуваат и на Божествената Литургија со примање на Светата причест. Всушност самиот овој чин не треба да биде сфатен како еден обичен ритуал, ниту некаква натпреварувачка игра на којашто целта е само да се фати крстот, туку учесниците после Литургијата треба со литија да се упатат кон местото каде што ќе се осветуваат водите, и тука со најголема почит и внимание да ги слушаат прекрасните молитви на водосветот, без непристојно однесување и викање, бидејќи така си го отфрлаат благословот. Оној, пак, кој ќе се удостои да го извлече крстот што се допира до водите и ги осветува, и да му го врати на свештеникот, треба претходно да го целива со вера, да им даде и на другите околу себе да го целиваат за и тие да бидат благословени. Потоа да го однесе благословот и во својот дом кај своите ближни, зашто крстот треба да им стане она што ќе ги обединува сите во взаемна љубов и силна вера во Христа.“, се вели во известувањето од манастирот.

Заинтересираните кои сакаат да земат учество во чинот на полагањето на крстот во водите на реката Радика, може да се пријават кај надлежниот архимандрит, отец Доситеј на телефон: 070 342 970.

фото:Бигорски манастир