Боки 13 оди во притвор

Судија на претходна постапка во Кривичниот суд доцна вечерва му одредил 30 дневен притвор на Борјан Јовановски – Боки 13, објави порталот А1он.

Боки 13 е првоосомничен во случај за изнудување на милионска сума пари од бизнисмен за да влијае врз кривична постапка. Како што обзнани денес Јавното обвинителство за организиран криминал, тој се товари за трговија со влијание врз јавен обвинител, при што од бизнисменот  зел 1,5 милиони евра. Боки 13 е осомничен и за перење на пари.

Претходно вечерва и на второосомничениот, бизнисменот Зоран Милевски му беше одреден 30 дневен притвор.

Во меѓувреме, на специјалната јавна обвинителка Катица Јанева и бил одземен мобилниот телефон, по наредба на обвинителството заради прибирање на повеќе информации околу истрагата.

Претрес бил извршен во домовите на осомничените и во канцеларијата на Боки 13 во 1ТВ.